森‧子‧的‧世‧界

等啊等啊  望啊望~~~

總算是予我等著這擺霹靂的尪仔(奇怪~這明明就是肨奶宏的tshit4迌物，我是咧等啥物)

一擺兩隻^^

!!!弁襲君!!!

稱號黑罪孔雀，神祕宗教逆海崇帆的主事者之一，佇組織內底稱作聖裁者‧地擘。

這身是我今仔轉來看霹靂拄著的第一个(臭煬)歹人，伊的名號真濟，想袂到這馬的布袋戲連號名攏遮爾複雜= =

肨奶宏逐擺攏叫伊「扁食湯」(因為「弁襲」佮「扁食」音差不多)，予我看著伊就想欲笑。

其實，弁襲君真有霸氣，閣有一種神祕高貴的氣質，佮伊的稱號「黑罪孔雀」配起來真有般，目睭微微，高高在上，袂輸神咧看下跤的凡人。

手提地擘印，象徵伊的權勢，正手是長長的孔雀趾，逐擺展功夫攏有伊的『特寫』。

上蓋古錐是伊的寵物──兩隻禘猊(細隻弄獅)，是伊的交通工具，使用的方法是跤踏佇頂面，會當飛來飛去，平衡感愛有練過才通用。

毋過禘猊真少出現，應該是因為傷歹弄，師父欲趕錄影的進度，就省起來矣。

再來是妖嬌的宮無后!!!看伊的目尾勾了偌爾仔媚!!!

宮無后手提朱虹劍佮蝴蝶瓶。

蝴蝶瓶內底關蝶仔(廢話)，伊上愛看蝶仔助佇內底烏白颺颺飛，一直到死，然後閣甲蝶仔的屍體燒掉，

因為伊感覺受困無助的蝶仔佮伊家己的命運真相siang7。

伊悲慘的運命源自目睭下跤的血淚之眼(看到後尾，我嘛毌知影血淚之眼會當創啥)，

所以自細漢就予煙都大宗師掠去閹><

因為手術的過程眼中所見攏是紅色的血，所以伊上愛紅色。(是講敢無注麻射?)

簡單講就是一个變態的太監(所以伊叫「無后」=「無後」)。

這身閣有另外配備一个劍鞘，會當佮蝴蝶瓶替換落來。

講實在話，這身的神韻真正是做了好!

最後分享一段影片，是霹靂真有代表的武戲。我是佇高雄的霹靂武俠展覽看著的，因為傷過強，所以轉來就變布袋戲迷矣。

(影片來自霹靂的官方網站)